بقلم: مينا واصف
كرسي في الكلوب .. "ازاي يا جدع " كلنا اول لما بنقرا الجمله دي بنفتكر فنانا الجميل " عادل امام " وتقريبا بقت شعار معظمنا لما بيندهش من حاجه او موقف معين ..لاسف المره دي مش مجرد موقف مش اول وﻻ لا تاني ولا عاشر حتي .. دي بقت ظاهره.. ظاهره " مقرفه " .. كلنا لما شفنا او سمعنا عن شويه ال " ....... " -

وسامحوني مش قادر اقول عليهم شباب او بني ادمين حتي لانهم ميستاهلوش - اللي اتحرشو بالبنات في التحرير كلنا كان لسان حالنا " ازاي يا جدع " .. ازاي لانه كفايه بقي .. ننضف بقي .. ازاي لانك يا شاب يا محترم ده احنا نازلين بنحتفل وبنبدأ سوا " عهد جديد " نقوم نعمل كده ...

لكن من الواضح اننا لما بنقول عيب متعملش كده دي زي اختك او امك في البيت واضح كده ان الكلام ده فقد بريقه يعني معادش يأكل عيش زي " القعدات العرفيه " كده بالظبط .. عفوا .. مفيش الكلام ده في دولة القانون لمؤاخذه مش هندلل عشان نصون ونحترم انسانيتنا قبل ما نحترم بعض لانه اصلا لما نعمل كده -التحرش - يبقي فين احترام البني ادم لنفسه ..

اذا كنا بنعشم في بداية جديده بنقول مش كله في ايد الحكومه لازم الشعب يبدأ بنفسه لكن لما يكون في قله من الشعب مش قادره تعمل ده .. هنا بتيجي قوة الدوله قوة قانونها لان الانسان بطبعه بيعشق الغلط لكن لما يشوف ان اللي غلط لمؤاخذه " اتقطعت رقبته " بالمعني البلدي الدارج يبقي كله هيحترم نفسه كله هيمشي في حاله .. لحد ما ربنا يكرمنا ونقدر نطلع عيالنا علي غير ده .. ده عيب صدقوني ومش اي عيب .. للاسف احنا لازم نعترف ان فينا ناس " مريضة جنسيا " ..

وده لاسباب كتير تقريبا كلنا عارفينها .. المهم سيادة الرئيس " السيسي " انا واحد من كتير انتخبو سيادتك .. واحد من كتير فرحو بيك .. واحد من كتير عشمان ان الموضوع ده ميعديش مرور الكرام .. لانه مينفعش ومينفعش وعمره ماهينفع .. الواحد بيبص للي بيحصل ده بعين حزينه لانه لحد وقت مش بعيد مكناش كده مكناش بنعمل كده .. كنا بنحافظ علي بعض ونخدم علي بعض .. ده حتي الغرب بيقول علينا جدعنه وشهامه و ... و .... اخيرا مينفعش نكتفي بالولوله في التليفزيونات وتبقي " سبوبه " للبعض بياكلو من وراها لقمة عيش حلوه .. لا . في انتظار حكم رادع يبقي عبره لكل واحد مش عارف يحترم نفسه او انسانيته او بلده .. صدقوني عييييييييب علينا نرضي بكده ..