نشر، عبدالله عاصم، المعروف بـ«المخترع الصغير»، مقطع فيديو لأحد المشروعات التي عمل عليها، وهو عبارة عن «نظام واقع افتراضي» لأهرامات الجيزة، تشعر السائحين وكأنهم متواجدون في المكان، معتبرًا أن بإمكان المشروع تشجيع حركة السياحة إلى مصر بتقنيات حديثة.

وقال «عبدالله»، في صفحته على «فيس بوك» عن المشروع: «هو نظام واقع افتراضي لأهرامات الجيزة بمعنى أن تكون كأنك في مكان الأهرامات بالظبط وشايف كل حاجة حواليك الأرض والسماء والأهرامات الثلاثة وأبو الهول وبعد كد ممكن تركز على هرم منهم وتنزل تدخل جواه وتتفرج على كل التفاصيل لحد ما توصل للمومياء بتاعة الفرعون كأنك في المكان بالظبط بس زيادة على كل كدة إنك تقدر تطير في المكان».

وأوضح: «ناس كتير هتسأل الموضوع ده هيفيد بإيه؟ إحنا دلوقت السياحة عندنا ضعيفة لظروف البلد لما إحنا نقدملهم وسيلة تعيشهم في مصر وتخليهم يشوفوا الآثار والموضوع مش متوقف بس على الأهرمات ممكن المعابد وحاجات كتير جدا والموضوع هيبقى مربح بشكل كبير أوي».

وأشار إلى أنه تجربته بنيت على فيديوهات سابقة ومن خلال الاستعانة بـ «google maps v3»، مُضيفًا: «بكده بنقدم تكنولوجيا حديثة ومستمرة لكل الناس اللي نفسها تزور مصر».

ويتواجد عبدالله عاصم، 17 عامًا، في الولايات المتحدة حاليًا، بعد رفضه العودة مع وفد مصر المشارك في مسابقة «إنتل» للعلوم بولاية كاليفورنيا، خشية القبض مرة ثانية بتهمة التظاهر بدون تصريح والتحريض على حرق سيارات الشرطة عبر صفحته على «فيس بوك».