مرقس كمال
أه بجد الصورة حلوة بس محتاجة لرتوش
زود الضحكة شوية كبر العين والرموش
شيل علامة الهم منها امسح الحزن وحوش
ايوه حوش
يالا حوش
امحى تجاعيد من غضب شبهتهم بالوحوش
مد ريشتك هات وشوش
هات وشوش بتدارى روحها بالعنين مبيتشافوش
واهبة روحها أة وقلوبها حتى للى ميشتروش
أه بجد الصورة حلوة بس محتاجة لرتوش

بص ع اللى مدى ضهره بكل قسوة وبعناد
للقلوب اللى تقوله محتاجين قربك يا واد
مرة ييجى مرة يبعد بس برضو الهجر زاد
أصل هجره كتير بيوجع اللى حبه غذاه وزاد
يالا غير باجتهاد
إقلب الصورة وارسم احلى فرحة للى عاد
حط راسه ف حضن دافى حتى لو كرر وعاد
مهما طالت كل غربة الحب جاى وفى المعاد
ايوه جاى وفى المعاد
ده الحنين وجعه يهون ويا لحظة استعاد
كل حب كان فى قلبه لسه فاكر منسيهوش
أه بجد الصورة حلوة بس محتاجة لرتوش

ع اليمين فى الصورة حتة حيرتنى فى السؤال
ليه لونت بكرة اسود ليه رسمت الحظ مال
واللى ضهره محنى عاجز واللى ماشى باختلال
حط شمس فوق تنور زود الصورة جمال
خلى نور املها يشرق يدى صبر واحتمال
وبيياض الفرح اكد اوعى ترسم احتمال
لو تشكك لو تحبًط تبقى صورة للزوال
يالا جدد الامال
يالا حرك الجبال
ده الإله اللى خلقنا معجزاته منتهوش
أه بجد الصورة حلوة بس محتاجة لرتوش

ع الشمال حطلنا شجرة كل غصن فيها باين
دارى بيها شرخ واضح للى يفحص أو يعاين
خلى طبع الغصن بلسم يبقى سهل ف ميله لاين
ويا نضج الثمرة ينزل ينحنى لإيد كل كاين
اللى امين وعهده حافظ واللى جاحد واللى خاين
خيرها للى يهين تعبها واللى حافظها وعاين
رش تحت بذار محبة حول الصورة جناين
كل عين تشوفها تفرح يشوف صاحبها الهم هاين
يبقى للدنيا مداين
يدور يطوف كل المداين
ينشر الخير زى شجرة عوض التعب مايستناهوش
أه بجد الصورة حلوة بس محتاجة لرتوش