عن حكاية مهنته، فتح عشماوي قلبه لـ"الوطن" قائلًا: "مبيخشش الشغلانة دي غير اللي وصل 50 أو 45 سنة.. مينفعش واحد عنده 20 سنة ويبقى ريس ينفذ الإعدام.. لأنه عمل مش عادي.. الشغلة دي عاوزه واحد بنيانه قوي زيي كده، وعقله كويس وشخصيته قوية، ومش بيهاب حد ويكون ملم بالحياة اللي عايشها".

 

يصف حالته وهو داخل غرفة الإعدام، كأنه داخل مكانه الطبيعي وليس مقدمًا على إزهاق روح بشرية: "وأنا داخل حكم الإعدام بكون في حالة تانية غير الحياة الطبيعية دي.. لما بادخل على الحالة باحط مواصفاتها في دماغي، وأعملها الحبل اللي يناسبه.. بيبقى كل تركيزي عايز الحالة تبقى مظبوطة، والشغل يطلع تمام، لأنك مش بتكون لوحدك.. انت بتكون وسط لجنة مكونة من 40 شخصًا.. والفشل بييجي لما التقدير بتاعك ميبقاش مظبوط.. ودي تبقى وحشة في حقك وسط اللجنة".

 

 

يروي عم حسين قصة إطلاق "عشماوي" على منفذ الإعدام، قائلاً: "أول من اشتغل بهذه المهنة رسميًا في السجون كان اسمه أحمد عشماوي، وكان رجلاً قوي البنيان، ذو شارب ضخم يرهبه الجميع.. ولوجود تشابه في اسمه الأول مع آخرين في السجن، كان المأمور يناديه بلقبه وهو عشماوي، وهكذا أُشيع بين الجميع أن عشماوي هو المنوط به تنفيذ حكم الإعدام، وصار حتى هذه اللحظة كل من يأتي لهذا المكان يلقب بعشماوي".

 

"المشنقة" كانت حلم حياتي

 

"حسين قرني حسين الفقي، ده اسمي، بس شهرتي عشماوي، من مواليد 1947 بمدينة طنطا، قدمت طلبًا للسماح لي بالعمل بقطاع السجون عسكري 1970، وبعدها بأيام وصلني خطاب يطالبني بالتوجه إلى سجن الاستئناف بالقاهرة لعمل الاختبارات، ونجحت فيها وكنت محبوبًا وسط زملائي، وبقيت بمصلحة السجون بالقاهرة لمدة 15 عامًا (حارس)، وكنت أشاهد عشماوي، وأتمنى أن أكون مكانه، فكانت المشنقة حلم حياتي، وكان عشماوي بياخد فى المرة الواحدة 5 جنيهات، بينما راتبي في الشهر كاملاً كان 15 جنيهًا، فجلست مع نفسي ودعيت أن أعمل حتى ولو مساعد عشماوي، وبالفعل خرج أحد مساعديه معاش، وطلبوني، وتم اختياري مساعد عشماوي، وكنت أسافر معه محافظات كثيرة، وكان دوري يقتصر على إحضار المتهم من غرفته، وإحكام السيطرة عليه، واقتياده لمكتب مأمور السجن، ثم توصيله إلى غرفة الإعدام".

 

عشماوي ينفذ الإعدام

 

يروي "عم حسين" اللحظة الأولى قبل اقتياد المتهم لحبل المشنقة: "يتم إخطاري بالواقعة قبلها بأسبوع، وأسافر إلى السجن الذي سيتم تنفيذ حكم الإعدام بداخله قبلها بيوم، وأبيت في استراحة السجن".

 

ويضيف "طبعًا عيني مش بتشوف النوم، وبالقي نظرة على المتهم عشان أحدد طوله ووزنه، لأن لكل شخص حبل معين، حسب الطول والوزن، ثم أتأكد من سلامة الطبلية والمكان، وأنزل إلى المتهم 5 الفجر، وتتفتح أوضة الحجز بتاعته، والمساعدين يجروه بقيود حديدية لأوضة المأمور، ويفضل فيها من 5 إلى 7 صباحًا وقت التنفيذ، ودول يا ابني أصعب ساعتين في حياته، وبعدها نوديه غرفة الإعدام 7 صباحًا، ويتم استبدال القيود الحديدية بأخرى من الجلد، عشان ميأذيش نفسه، وطبعًا بيكون لابس الزي الأحمر، وألبس أنا الملابس السوداء، ويكون معانا 40 شخصًا من الطب الشرعي والقضاة، ومندوب من مديرية الأمن التابع لها، وشيخ في حالة لو كان مسلمًا، وقسيس في حالة إذا كان قبطيًا، بالإضافة إلى مأمور السجن".

 

وأضاف: "يقف المتهم وسط مساعدي الأول والثاني، أمام غرفة الإعدام، وتتم قراءة ملخص سريع للقضية، إنه في يوم كذا حدث كذا وصولاً إلى صدور حكم عليه بالإعدام شنقًا، وعند كلمة شنقًا، أتحرك أنا نحوه وأستلمه وأتوقف به ثوان، حتى يقول له الشيخ (قول يا ابني ورايا أشهد أن لا إله إلا الله وأن محمدًا رسول الله)، ويرددها المتهم، ثم أضع الطاقية السوداء على رأسه، وسائل صابون حول الحبل قبل وضعه حول عنقه، ثم يقف قرابة دقيقة، وأنتظر الإشارة، ثم أسحب السكين ليسقط في البئر مشنوقًا، حيث تحدث هذه العملية كسرًا في فقرات الرقبة وتهتكًا في النخاع الشوكي، فيموت على إثرها المحكوم عليه، خلال دقيقة أو دقيقتين على الأكثر".

 

ويتابع الرجل ذو الصوت الجهور، قائلًا: "أنزل أنا برفقة مساعدي لنقل الجثة من البئر، عقب إتمام عملية الشنق، حيث تختلف غرفة الإعدام من حيث المساحة من سجن إلى آخر، ويتوسطها طبلية خشبية، أسفلها بئر عميقة لمسافة 4 أمتار، بها سلم حديدي، ويعلو الطبلية (بلانكو) من الحديد على ارتفاع مترين يربط فيه الحبل، والطبلية عبارة عن ضلفتين يقف عليهما المحكوم عليه بالإعدام، وتفتحان بواسطة ذراع حديدية في الجانب الأيمن، تسمى السكينة، وعندما يأمرني رئيس النيابة بالتنفيذ، أسحب الذراع لتُفتح الطبلية، ويسقط المحكوم عليه في البئر، وهو مكتوف اليدين بواسطة حزامين جلديين، معلقًا من الرقبة في حبل مصنوع خصيصًا لذلك"، موضحًا: "ينفذ الحكم ثلاثة أشخاص، يقتاده اثنان من الخلف لمنع تحركه، ويضع الجلاد الحبل حول رقبته.. الموت بالإعدام له مواصفات.. وهي كسر فقرات العنق دون إسالة دماء أو جرح، وبعد التنفيذ يكون كالنائم، كل شيء به كما هو، الوجه والجسد، ولكن التنفيذ الخطأ يؤدي إلى عملية خنق وألم للمحكوم عليه"، وعن حبل الإعدام، يقول "عم حسين": "آخره 3 حالات وبيتجاب بـ750 جنيهًا، ودي عهدة بتستلمها".

 

 

"سنة 98 كنا في سجن بنها لتنفيذ حكم إعدام، جاتلي أول فرصة لأني أكون عشماوي، وأفتكر إني عدمت اتنين، ست كانت متجوزة فلاح في المنوفية، وعلاقة خاصة حصلت بينها وبين أخو جوزها، وقتلوه ورموه في النيل، وخدت على الرأسين 80 جنيه".. هكذا يصف عشماوي أول حالة إعدام نفذها، قائلًا: "عرفت بعد كده إن مبيروحش المكان ده غير اللي يستاهل طبلية الإعدام.. واللجنة بصت للي عملته، كنت عايز أشنقهم تلات أو أربع مرات، لأن ده فساد في الأرض وانت بتحاربه، ولما المأمور بيقرأ ورق الحالة قدامك بيبقى كله ساخط على اللي عملته".

 

مظلوم على حبل المشنقة

 

"عم حسين"، "العشماوي" الذي قتل 1070 شخصًا على يده، يقول إنه لم يقابل مظاليم أثناء تنفيذ الإعدام إلا في حالة واحدة، قائلًا: "مرة كنت في سجن إسكندرية، وكان المحكوم عليه مساعد شرطة من أسيوط، وكان بيشتغل فى قسم اللبان، وأثناء التنفيذ صرخ وقال (يا رب.. يا رب)، اتخلعت قلوبنا من مكانها، والراجل قال اعدموني بس أوريكم حاجة، وورانا آثار حوالي 45 غرزة طول وعرض، وقال ده دليل براءتي.. نفذت فيه الحكم، ونزلت أتابع شغلي، لقيته زي ملاك نايم، وعرفت إنه جه وأسرته الإسكندرية، واشتغل في قسم اللبان، وكان بيدور على بيت، ولقى حتة أرض، وكان جيرانه مسجّلين خطر وبيرخموا عليه، وفي يوم حطوا بنته في طرنش وضربوها بالطوب والجزم، وبلغوه، وجري طلع بنته، وفوجئ بواحدة من العيلة دي بتشيله بإيديها الاتنين وماسكاه زي بتوع المصارعة وبتشده من حتة حساسة، دي اللي عملت له الجروح اللي مخيطها.. المهم هوّ كان جسمه قليّل والشارع كله اتفرج عليه وواحدة ست زنقاه.. كان هيموت في إيديها، وطلّع سلاحه وهي شايلاه وضرب طلقة في دماغها وماتت.. وقرايبها شالوها ونيموها على السرير، وقالوا إنه دخل عليها البيت وقتلها هناك مش في الشارع.. ومنعوا الناس من الشهادة، والراجل راح فطيس بسبب دفاعه عن نفسه.. اتعاطفت معاه وأنا بنفذ وقلت يا ريتني كنت مكانك".

 

عشماوي "إنسانًا"

 

من يقترب من عشماوي، يجده إنسانًا طبيعيًا، طيب القلب، يحبه أهله، ويحترمه جيرانه، ويقدِره رؤساؤه، لكن المجرمين والمسجلين خطر يكرهونه، يجلس دائمًا على قهوة ناصية الشارع ممسكًا "الشيشة"، يرى أن مهنته موعظة له ولأولاده.. "كنت بقولهم على كل حاجة كنت بعيشها في غرفة الإعدام عشان أديهم موعظة إن اللي بيمشي ورا الشيطان يبقى آخرته كده.. عشان يعيشوا وسط الناس محترمين مايفتروش، ومايجروش على مخدرات وغيره، ياما مخدرات جابت لناس الإعدام"، ويروي حكاية تاجر المخدرات الذي نفذ فيه الإعدام، قائلًا: "كان فيه قضية لواحد اسمه سمير صادق في مصر الجديدة، كان بيوزّع بودرة على أندية الناس الغنية، اتنفذ فيه حكم الإعدام، كان بيحاول يفلفص من حبل المشنقة، مسكت دراعه وشديته شدة خلص فيها".

 

وعن حياته الأسرية، يقول "عم حسين قرني" بخفة ظل: "الحاجة اللي معايا دلوقتي، عمرها ماخافت من مهنتي يوم، ربنا يحفظهالي وأكرمني منها بولدين، لكن زوجاتي الاثنين قبل دي طلبوا الطلاق مني بسبب مهنتي، والحمد لله عندي منهم عيال متجوزين دلوقتي".

 

عشماوي: لو ما نفذتش الإعدام يبقى بتخالف "شرع الله"

 

يرى عم حسين أن "دي أعمار وربنا هو اللي كاتبها، ريا لما جات تتعدم قالت أنا فرحانة مش زعلانة إني هقف في الحتة اللي بيقف فيها الأبطال، ودي ست قتلت 25 واحدة، وده قصاص ربنا عز وجل، قتلت روح روحك قصادها، والدول اللي لغت الإعدام دي دول رايقة.. ربنا قال (ولكم في القصاص حياة يا أولي الألباب)، ولما تزهق روح وتبقى قصادها مدى الحياة يعني بتديلي حياة وتبقى خالفت كلام ربنا شرعًا، وشريعة الله في الأرض إنك تدي كل واحد حقه".

 

يقول عم حسين، المحبوب وسط أهالي منطقة الزاوية الحمراء: "أنا لما ساعات بانفذ في حد إعدام بقوله معلش، يقولي مفيش معلش، إزاي تقول معلش وتخالف شرع الله، ده ربنا كاتبلي الموتة دي، ومبيروحش المكان ده غير اللي يستاهل طبلية الإعدام".

 

عشماوي: مفيش غير حالة إعدام واحدة بعد الثورة.. "البلد بقى فيها تسيب"

 

يرى عشماوي أن البلد بعد الثورة صار بها "تسيب"، ولم تنفذ أي حالة إعدام سوى واحدة منذ 25 يناير، قائلًا: "أيام حبيب العادلي كان فيه شدة وكنا بناخد باللي نفذ واللي شارك، كان الإرهاب بدأ في بداية التسعينات وانتهى في نهايتها، بسبب أن ساعتها كان بيتاخد كله إعدام، وكان كله بيروح للقضاء العسكري يخلص على طول، أما دلوقتي بقى فيه تسيب ومفيش غير حالة واحدة اتنفذ فيها حكم الإعدام بعد الثورة وهي قضية ماسبيرو".