بقلم : للشاعر فايز البهجورى
خد يا عزيز " الزعف " واعملّى قربانه
دا الناس فى " حد الزعف " بتغنّى فرحانه
أهلا " بحد الزعف " بالبشره وافانا .
بعد الصيام الكبير... جه عيد الشعّانين
*---------------***-------------*
خد يا سمير الزعف ، اعمل فنون ألوان
عايز أهدى حنّا " صليب" وأهدى لطيف " قربان "
وسامى بيحب الزعف ... حاهديه "تلات صلبان "
وأهدى كمان صلبان ... للناس الطيّبين
*---------------***-------------*
وصديقنا عبد المسيح محتاج نجيب له " قلب "
من يوم ما تم زواجه... ما عاد فى صدره " قلب "
دايما يسيبه فى بيته، وماشى من غير"قلب "
خلّى اتكاله على ربه ، يكون له معين
*---------------***-------------*
يا مجدى يافنان ... من بدرى باستناك
جبت الزعف فى انتظارك تضفرلى منه "ملاك "
عشان أعلّقه فى الحيط ... ويفضل تملّى هناك
بركه لأهل البيت ، طول أيامنا الجايّين
*---------------***-------------*
ومبروك ياشعب الكنيسه بالزعف مبروك
مبروك ياراعى الكنيسه الطيب المبروك
ويارب تحمى الكنيسه وتنصر اللى دعوك
وتعيش ياشعب الكنيسه وكل عام تحتفل
بصومك الكبير ، وأحد الشعّانين
-----------------------
نشرت لأول مرة فى عام 1959 بجريدة " مصر " اليومية المسائية التى كانت تصدر بالقاهرة فى الخمسينيات من القرن الماضى
English
