هااا.. قلعتي الحجاب ولا لسة؟؟
 إنه التريند الحديث...تريند قلع الحجاب
أنا عارفة إن الحجاب تقيل أوي علينا...بيخلي شكلنا مكحتل علي مبيئ....دا غير العشر سنين اللي بيضيفهم علي سِننا...و يا سلام بقي لما تيجي مناسبة...فرح مثلاً ولا خطوبة....و تلاقي نفسك لابسة الفستان البروتيل و شكلك مزت المزز و ييجي البوليرو و الطرحة الشيفون يدمروا مزت المزز و يحولوها لبلاص
 
أنا فاهمة والله كل دة لأني الحمدلله محجبة...فحسة أوي بالإحساس بتاع الأفراح و السواريهات و إن الحجاب و السواريهات دونت ميكس
 
و ياسلام بقي لما ييجي عيد ميلاد صاحب جوزك و تلبسي و تتشيكي و تقمطي القمطة و تروحي تلاقي مرات صاحب جوزك مثلاً يعني مش محجبة و قردة...بس القردة عاملة شعرها أصفر و كيرلي و ميك آب و لابسة  بنطلون چينز من البنطلونات المقطعة حتي أعلي منطقة الفخد....علي توب بقي مفتوح...و هي قردة أساساً..و إنتي أصلاً أحلي منها ب ٣٠ مرة....بس هي عاملة في نفسها كرنڤال...و إنتي يا عيني أخرك رابطة سبانيش و فاكرة نفسك إنك كيوت...فهي لفتت الأنظار كلها شعر أصفر بقي و لبس...أما إنتي فقومي يا أختي قطعي التورتة بتاعت عيد الميلاد ولا إجري ورا عيالك يا ختي ولا أقولك قدمي السيڤين للناس
 
طبعاً أنا إتكلمت علي المناسبات و أغفلت خالص الكلام عن الفصل القاتل للمحجبات
 
فصل الصيف
 
البنت المحجبة مبتحسش بفرق بين شتا و صيف...دا لإنها طول السنة لابسة بكم...أيوة إحنا المحجبات مبنصيفش...و مبنحسش إن الصيف جية أصلاً...أيوة إحنا المحجبات نفسيتنا بتقوم علينا لما بنلاقي بنات لابسين نص كم و إحنا لأ....أيوة إحنا المحجبات نفسيتنا بتقوم علينا لما بنلاقي بنات شعرهم بيطير و احنا آخرنا حرف الطرحة يطير فتبتدي البنت مننا تعيش الدور قال يعني شعرها فتلاقي جوزها أو خطيبها بيقولها (إعدلي الطرحة) فراح الدور الي كنا لسة هنعيش فية
 
هتناول إنهاردة نموذج البنت المحجبة المُصيفة...البنت تلاقيها لابسة كارينا كم و عليها تيشرت نص كم زي بتاع البنات اللي مش محجبات...يعني مصيفة بقي هية كدا!!...لا بجد!! إنتي لما تلبسي كارينا كم و عليها توب نص كم..إنتي كدا صيفتي؟؟؟ أيوة يعني لما أشوف كارينا كم و عليها توب نص كم أفهم أنا بقي كدة إن الصيف جية!!.... و غالباً بتبقي رابطة طرحة ذو ألوان صيفية فسفورية...و يا سلام بقا لما تسافر تصيف....إديني في البيائة يا معلم....تلاقي البنت المحجبة مننا قاعدة عالبلاچ متكومة علي جمب...قاعدة متدارية تحت الشمسية....و لابسة ليجينج علي توب ترواكار...و الطرحة طبعاً سوبر سبانيش...حلق...روج بينك فاقع...غوايش بلاستيك أورنج و أصفر....شبشب يحمل لوك هاواي...مونيكير أورنچ في أصابع الرجل...و طبعاً لازم خلخال....و هوا دا لوك الفتاة المحجبة في المصيف
 
و تلاقي البنات اللي مش محجبات حواليها مش لابسين حاجة و برضو مغطيين عليها
 
الله!! لية كدا بقي؟؟
 
طب دي البنت لابسة ليجينج و طرحة و توب و شبشب و حلق و غوايش...مكلفة نفسها يعني تقوموا سايبينها و زابلينها و باصين عالبنات اللي مش لابسين غير مايوة قطعتين إلا قطعتين...ينفع كدا؟؟
 
تيجي الأستاذة المحجبة تقلع هدومها عشان تنزل البحر
 
تبتدي تقلع طبقة ورا التانية ورا التالتة ثم الرابعة و هوب....الماكنة طلعت قماش
 
ظهر المايوووووة

ظهر المايووووة
 
إحم إحم
 
المايوة بتاعنا طبعاً كلكو عارفينة....بدلة غطس سوداء اللون...و في اللي بيكلف نفسة و يجيب چيبونة ملونة بألوان قوس قزح و فية اللي بيلف طرحة حوالين وسطة قال يعني هية كدا بقي لابسة كاش مايوة!! كاش مايوة لما ينططك يا بعيدة...مع بونية مذهل عالراس...بالإضافة إلي السان بلوك اللي الإستاذة بتطلعوا من شنطتها عشان تدهن منة!! بتحط سن بلوك إقتداءً بذوات القطعتين (البكيني يعني)...ستايل برضو السن بلوك دا...و هي مفيش حاجة باينة منها إلا وشها و كفها!! بس أهي عُقد و خلاص...إدهني ياختي السن بلوك إدهني يا ناصعة البياض لحسن وشك يسمر تبقي مصيبة
 
و يبتدي كورس الغطس

 
الفتاة المحجبة تمشي بكل ثقة متجهة نحو الشاطئ...و تفضل تحط حرف رجلها في المية...و تعمل نفسها ياي بردانة...ياي المية ساقعة عليها...كيوت...و طبعاً محدش بيعبرها ب توب القماش اللي هية لابساة دة...فلما تلاقي محدش عبرها...بتقوم غطسانة في المية بسرعة البرق

 

تيجي بقي الأستاذة تطلع من المية....تلاقي جوزها (ده في حالة المتجوزين) جاي جري عليها...عشان يديلها الفوطة عشان تلفها حوالين جسمها و هي طالعة من المية...جريت عليك عقربة يا شيخ!! فوطة إية و نيلة إية!! إنت شايفها منظر أوي!! بلبس الصيادين اللي هي لابساة دة!! فيقولك (لأ أصل المية مخلية المايوة لازق علي جسمها)...جسمها!! هاهاااا... جسمها!! دة علي أساس إن الشباب هتسيب الفاتنات المكشوفين...و يقعدوا يبصوا علي مراتك اللي لابسة ٦ متر قماش و ماشية تنقط...ياض دي ماشية تنقط!! بقولك بتنقط
 
العقلية الشرقية يجب أن تذهب إلي الجحيم
 
والله أنا حاسة جداً بكل الكلام اللي بيدور جوا البنات المحجبات...لإني زي ما قلتلكوا إني الحمدلله محجبة..هو حجابي مش حجاب صح طبعاً...بس أهو الحمدلله و إنشاء الله ربنا يهديني و أحسن من حجابي
 
أنا زيكوا يا بنات
 
في الصيف بحاول ألبس لبس خفيف شوية عشان محسش بالحر و برضو بضرب الطرح الفسفوري
 
بس عالبلاچ ملهاش حل!! برضو و ليا الفخر بمشي أنقط و أنقط و أنقط
 
وكتير أوي حسيت إني خلاص إتخنقت جداً من الحجاب...و إني عايزة أقلعة
 
و كتير أوي برضو بصيت لنفسي في المراية و أنا بشعري و شفت نفسي أحلي مليون مرة من شكلي وأنا بالطرحة
 
و كتير لبست تيشرتات و قمت لمة شعرى ديل حصان و قلت فيها إية لما أنزل كدا؟؟
 
و كتير في الصيف حسيت إني حرانة من الطرحة و اللبس اللي بكم وقلت فيها إيه لما أنزل بلبس صيفي؟؟
 
وكتير مسكت موبايلي و شفت علية صور ليا بشعري و قلت فيها إية لما أحط الصورة دية عالفيسبوك؟؟
 
و كتير سافرت العين السخنة و الساحل و حجابى خنقني جداً..و قلت فيها إية لما ألبس كت و شورت زي بقيت البنات؟؟
 
و كتير جالي أفراح و قلت لنفسي فيها إية لما ألبس الفستان السان بروتيل دة كدا من غير كارينا و بوليرو؟؟
و كتير و كتيييير و كتيير و كتير
بس رجعت فكرت بيني و بين نفسي
 
قلت إزاي؟؟
 
إزاي ربنا يبقي عايزني...و أنا أقولة لأ
إزاي ربنا يبقي بيحبني...و أنا أرفض حبة ليا
اه والله
طب إنتي عارفة إن فية بنات كتير أوي أوي مش محجبات؟؟
 
إنتي بقي عارفة إن ربنا سابهم و إختارك إنتي...إختارك إنتي و خلاكي تتحجبي عشان بيحبك...عشان عايزك معاة في الجنة...عشان عايزك تعملي كل الفروض اللي عليكي عشان بيحبك و خايف عليكي لنار جهنم تمِسِك
 
و إنت بقي عايزة ترمي حب ربنا ليكي و تدوسي علية عشان شعر كيرلي و لبس صيفي

والله الموت مش بعيد...والله مش بعيد
 
إنتي في أي لحظة ممكن تموتي...فلية بقي تموتي و إنتي مش راضية ربنا؟؟ عشان ترضي الناس اللي حواليكي؟؟ تزعلي ربنا منك عشان الناس اللي حواليكي يقولوا عليكي مزة؟؟ طب و لما تموتي و تدفني و تبقي تحت التراب لوحدك..المعجبين بجمالك و شعرك و لبسك و ستايلك هينفعوكي؟؟ تفتكري ممكن ينفعوكي؟؟
طب و لما تموتي و إنتي مزة هتفرق معاكي فإية؟؟ هو الكفن بتاع المزز اللي بشعرهم بيفرق عن كفن اللي ضاربة كارينا؟؟
 
الكفن مبيفرقش ما بين شورت و حجاب...بس اللي بيفرّق...الحساب
 
طب لما تطلعي لربنا و يحاسبك...هتقوليلة إية لما يقولك (أنا بحبك و خليتك تتحجبي عشان متشوفيش نار جهنم...بس إنتي عاندتي و عافرتي و برضو قلعتي الحجاب) هتقوليلة اية؟؟ هتردي بإية؟؟
 
متخليش البنات اللي حواليكي يفتنوكي بلبسهم و شعرهم...كلنا هنموت....المزة أم بكيني هتموت...المزة أم شعر أصفر هتموت...الوحشة اللي بتنقط هتموت...الوحشة أم كارينا هتموت...كلنا هنموت
 
طيب و لية نموت و إحنا مش عاملين اللي علينا؟؟
 
عشان لقب مزة؟؟
 
معلش مفيهاش حاجة فكك من الكلكعة و العُقد
 
و أنا بقولك أهو إنتي بحجابك بكارينتك بطرحتك بقمطتك بلبسك اللي بكم بسواريهاتك البيئة بمايوهك اللي بينقط عالبلاچ مزة
 
والله مزة
 
مش إنت راضية ربنا؟؟ واللي هتقولي (معلش يعني ماهو السكيني و الليجينج و السبانيش مش لبس حجاب...فالأحسن لها تقلعة..مدام هية كدة كدة مش محجبة الحجاب اللي يرضي ربنا) هقولها خليكي في حالك يا أمورة...و الدين درجات...مش معني إنها مش لابسة صح إنها تقلعة...الحل لإنها مش لابسة صح إنها تحاول تحسن لبسها...مش تقلعة خالص!!! ما إحنا لو مشينا بالمبدأ دة يبقي اللي بيصلي بسرعة يسيب الصلاة..و اللي بيتنرفز و يشتم غصب عنة و هو صايم ميصومش...واللي بيكدب و بيخون و بيغتاب يسيب الإسلام أصلاً
 
فكر خاطئ..و تفكير بدائي
 
دينا مقلناش إننا لو معرفناش نعمل الحاجة ١٠٠٪ صح  نقوم سايبينها...دينا مقلناش كدا
 
البنت اللي حجابها مش صح (زيي كدة) تحاول تحسن من لبسها و حجابها مش تقلعة خالص
 
البنت اللي عايزة تقلع الحجاب عشان شكلها كبر أوي...والله كلنا هنموت...المزة هتموت و المحجبة هتموت...و زي ما قلتلك الكفن و القبر مبيفرقوش بين شورت و طرحة....و صدقيني لما حسابك يبدأ مع ربنا ساعتها هتتبسطي بسنك الكبير اللي مكنش عاجبك في الدنيا
 
والله ربنا جميل و جنتة جميلة أوي
 
خلونا بقي ندور عالجنة....خلونا بقي لما يجيلنا الموت نبقي جاهزين لإستقبالة
مش الأحسن إننا نبقي جاهزين للموت؟؟
 
الموت لا ينتظر أحد
الموت غير مزود بخاصية الإنتظار
 
فإستعدي

روز اليوسف

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :