يبقى إنت أكيد في مصر

الراسل أنطوني ولسن
1- لما تلاقي مذبحة للأقباط..
في الكشح والزاوية الحمرا والعياط..
وقتل ونهب باستعباط..
يبقى إنت أكيد في مصر!!
2- لما تلاقي القبطي مالوش أي حقوق..
ومن مرارة الذل والمهانة يذوق..
وبيته وماله منهوب مسروق..
يبقى إنت أكيد في مصر!!
3- لما تلاقي الظلم زيادة..
وممنوع ترمم بيوت العبادة..
وإحباط كتير فوق العادة..
يبقى إنت أكيد في مصر!!

4- لما تلاقي دعوات للتكفير..
وكلام عن رضاعة الكبير..
والعلاج ببول البعير..
يبقى إنت أكيد في مصر!!
5- لما تلاقي حاميها حراميها..
عايش بس عشان ينهب فيها..
وناس مش لاقية هدمة تداريها..
يبقى إنت أكيد في مصر!!
6- لما تلاقي الظلم في البلد دستور..
وورا كل جريمة معتوه موتور..
وشعب عايش عبد المأمور..
يبقى إنت اكيد في مصر!!
7- لما تلاقي المحسوبية قانون..
والرشوة شطارة شغالة بجنون..
وإن قلت كلمة حق تكون مجنون..
يبقى إنت أكيد في مصر!!
8- لما تلاقي الخوف حواليك..
شيطان عمال يأكل فيك..
وغصب عنك تعمل إللي ما يرضيك..
يبقى إنت أكيد في مصر!!

9- لما تلاقي الحق باعوه..
والجبن بين الناس زرعوه..
والصدق في كل مكان قتلوه..
يبقى إنت أكيد في مصر!!
10- لما تلاقي نفسك عايش قلة موت..
عايش والفساد خيوط عنكبوت..
وممنوع تقول رأيك أو يخرج لك صوت..
يبقى إنت أكيد في مصر!!
11- لما تلاقي اللي بيفصل في أمورك ظالم..
والحق مشوه مالوش أي معالم..
ومجالس عرفية تقام بدل المحاكم..
يبقى إنت أكيد في مصر!!
12- لما تلاقي بين الناس خصام وفتن..
والشوارع فيها المجارى ضاربة وعفن..
وبطالة وجهالة وتحرش وقلة سكن..
يبقى إنت أكيد في مصر!!
13- لما تلاقي شعب مطحون قليل الحيلة..
وراقصة بتعلم الناس التقوى والفضيلة..
وناس زي خيالات المآتة نحيلة..
يبقى إنت أكيد في مصر!!

14- لما تلاقي على مخابز العيش طوابير..
ومن غير ذنب واقف على باب بيتك غفير..
وضابط يضربك على قفاك معندوش ضمير..
يبقى إنت أكيد في مصر!!
15- لما تلاقي شعب طيب عاطي أمان..
بياكل من خير بلاده ومش دريان..
يلاقي المية ملوثة والزرع جابله سرطان..
يبقى إنت اكيد في مصر!!
16- لما تلاقي في السجون ضرب وتعذيب..
وتحرش وحاجات تخلي شعر الوليد يشيب..
وتحس وكأنك قاعد في سجن (أبو غريب)..
يبقى إنت اكيد في مصر!!
17- لما تلاقي بين الشيوخ والقسوس نفاق..
وشجرة محبة خالية من أي أوراق..
وكلام مكرر مالوش معنى بس براق..
يبقى إنت أكبد في مصر!!
18- لما تلاقي ع التلفاز لحى بتتعانق..
وف كل واحد منهم احقاد بتتخانق..
وعاوز كل واحد يعمل للتاني مشانق..
يبقى إنت اكيد في مصر!!

19- لما تلاقي كلام كتير عن المواطنة..
وحقوق الغير والمحبة والموازنة..
وكلام كتير كدب ومالوش لازمة..
يبقى إنت أكيد في مصر!!
20- لما تلاقي كلام عن الوحدة الوطنية..
وإنه إحنا أكثر البلاد ديمقراطية..
وتلاقي الغلبان مقتول ومالوش دية..
يبقى إنت أكيد في مصر!!
21- لما تلاقي الموظف شعاره:كله تمام..
ولوعاوز تقضي مصلحة تدفع كام..
يبقى إنت أكيد في مصر!!

22- لما تلاقي الأخلاق بجد في أزمة..
ومشاكلك حواليك حزمة حزمة..
في بلد نهبوها ولاد الـ... !!!!
يبقى إنت أكيد في مصر!!
23- لما تلاقي في بلدك كلك مباح..
أرضك مالك عرضك تحت تهديد السلاح..
وعايش مستني الموت في كل صباح..
يبقى إنت اكيد في مصر!!
24- لما تلاقي الناس في بلد محكومة بالكرباج..
والبيه ساكن في قصر من الياقوت والعاج..
و90%من الشعب يشكي الذل والاحتياج..
يبقى إنت اكيد في مصر!!
25- لما تلاقي حقك قدام عينك راح لغيرك..
وإن تكلمت ربنا وحده يعرف إيه مصيرك..
يمكن سجن ويمكن قتل لحد ما يموت ضميرك..
يبقى إنت أكيد في مصر!!