ماجدة سيدهم
                
"  والآن بات لدينا من رصيد الشقاء ما يكفي لسعادتنا وبناء حلم الوطن "
*نوسة .. بائعه الخضار، مصرية الملامح التعبى وضحكتها أيضا  بجَلـَد السنين، تبيع مع طلة كل فجر خضارها وفاكهتها بنكهة وجع الشوارع ،لا تجيد  كبرياء الأبجدية لكن بالفطنة تقرأ على الملأ ما بين السطور، لاعين  ليها تنكسر ولا ذراع يلتوي ومهما شال ضهرها ما تعرف ف يوم تنحني ،أفهم بسرعة عينيها وأحب شجاعتها وأضحك من ابتسامتها المستخبية.  ،تنادي  كعادتها فتجلب  اليقظة والانتباه  للمارة وتلم الزباين حواليها  : قرب قرب السوق مفتوح وببلاش ، التلاتة بعشرة ، إيه اللي بعشرة يا نوسة ،جزمة أي تلات عساكر برقبة عشرة ألاف ابن كلب إخواني ، صباح الفل على الجدعان  اللي راجعين تاني ع الميدان.

 تاني يا نوسة ، وتالت وعاشر لحد ما تنضف م البهايم ،حلو وصابح يا دم الشهيد  (الطماطم )، أم الدنيا جامدة وصابرة وماتعجزش ابدا (البطاطس ) ولو سبتها ها تنبت لوحدها ،والنبي ماحدش يمد ايده يا جماعة على التفاح - دا ها نشربة إنشاء الله عصير في الميدان على روح البهايم وولاد الكلب ،هي الأيام زي بعضها ليه يا باشا ،سيسي يا سيسي أنا مستنية عريسي ،قرب على الصندوق الأسود(الباذنجان ) أكل الغلابة ،قلبه  شهد أبيض ومليان حديد ، تقدر تشيل ؟ شيل، أصل يا دكتورة  البلد زي عربية الخضار اللي يستعبط  فيها على الزباين  ويشتغل في المعفن والمضروب  يقلبوا على راس أمه العربية باللي عليها ،بالك يا دكتورة الناس من كتر المرض والغم  ومالقتش اللي يعالجها ويفهمها بقت ناصحة أوي وتعرف  دلوقتي تفرق بين الخضار النظيف و المسموم بعيد عن كبدك ، تجمع نوسة كل المعطوب من الخضار وتنادي: يا رضا (ابنها ) خد الأشكال المعفنة دي وارميها يابا في الزبالة هناك ، أوعي  ياباشا   لما ترشح نفسك  تقل من قيمتك وقيمتي

وتعمل مناظرة مع الأشكال الوسخة اللي لازقة في التلفزيون على طول ،  قرب مننا ياباشا واسمع كلام الغلابة ، يرضيك يحرقوا دمنا  ويحكموا بالبراءة على عيال ولاد ميتين كلب اللي قتلوا  البت الصغيرة بتاعة بورسعيد ، بس دول أخدوا 15 سنة يانوسة ، جرى إيه يا دكتورة هو لما أحكم ب 15 وكسة  على حلاليف  ، البرشام  طافح  من وش أمهم وشغالين مع بعض الله ينور، خطفوا واغتصبوا وقتلوا ورموا  الجتة  يبقى دا مش حكم براءة برضة ولا أنا مش أم ولاّ أنت

يادكتورة مش أم ولا ّهو الباشا مش أب برضة وعنده بنات..!،  دول لمؤاخذة  عواهر ولاد عاهرات ( بلغتها طبعا )  والشرفا بتوع حقوق الإنسان والمصحف أحسن حاجة ليهم  نسلط عليهم طفل واحد بس من دول يعمل معاهم أحلى واجب ، ونشوف هايدافعوا عن شرف أمه أزاي ..!  القانون كدا  يانوسة ، سيبيني والنبي يادكتورة أفضفض مع الباشا ، هو أكيد حاسس بينا ، يا باشا لما القانون يظلم الغلبان والضعيف والفقير والقتيل- الرّمة يعني واللي ف الأعر  - يبقى قانون ظالم ولازم يتغير، لازم يتغير سامعني يا باشا ،وإلاّ الوكسة بتاعة الاسكندرية  ،يا ليلة برنجان ومبذر كمان ، والنبي يا باشا قولهم  يحترمونا شوية ، إحنا طيبين اه بس مش هبل، امبارح  يا دكتورة  قعدت اتفرج على التلفزيون وسمعت الحكاية وجابين واحد عامل نفسه قاتل والمصحف  ماحصّل حتى فيلم فاشل خسارة التـّف
 

عليه ، والسوخة إن المذيعين ولا واحد اتلوح ولاّ استغرب إن القصة  ملعوب فيها  ،يكونش كلهم مطلسئين الحكاية على بعضها ..؟،يعنى أنا الست الغلبانة مادخلتش عليا الطبخة الزفرة دي ودخلت كدا على الناس اللميعة ،مش إحنا  بنفهم عنهم يادكتورة ، طبعا يانوسة ، نفسي أجيب المسؤولين بتوع  التصريحات والمداخلات  والسيطرة على الموقف ، وهامسك نفسي م الضحك وأسال أي واحد فيهم :هو سيادتك برضة مش قولت في الأول  إن القاتل أهبل زي كل مرة  وفكرتنا هانمشيها ، وبعدين قولتوا لاء دا القاتل  طلع أخو الراجل المقتول وبرضة  مانزلتش م الزور، وبعدين فركشتوها   وطلعتوا لنا بالسر الغامض والمأندل آل إيه علاقة وحشة ، نقوم إحنا بقا طب أنا راضية ذمتك  القاتل دا شكل ابن خدامة ، ولاّ دا شكل مدمن ، أصل  سعادتك مش عارف أنا ست شقيانة  وعمري كله في السوق ، متمرمطة يعني، وأعرف ريحة وشكل المدمن والنجس والخاين والأهبل والكذاب والمحترم كمان ، طب بلا ش دي ،أنت راجل فكيك ، بزمتك  شكل الست المقتولة  في الصورة مع أسرتها يجيب على وساخة وقتل كمان ،جوزها وابنها وأخت جوزها ف طلعة واحدة ، والله كبيرة في حق سعادتك دي ،دا شكلهم  ولاد ناس  وصغيرين يعني مالحقتش تكره جوزها وتعرف غيره دا على اعتبار انها من بئية واطية أوي أوي  ومع مين ..؟ابن الخدامة  بتاعتها .! طب بص تيجي تقف إنت  سعادتك  على العربية واشتغل أنا مكانك ،24ساعة  اجيبلك  جثة القاتل الحقيقي على كفة الميزان دي  واللي شكل سعادتك  عارفه بالتمام،  ولاّ اقولك  بلاش احسن تبهدل الخضار ،شوف ممكن تخبوا الحقيقة  بس  ماتتمسخروش بينا ، دا سعادتك  المثل بيقول كذب مرتب ولا صدق مفركش ، طب بص أنا مش هاتكلم معاككتر خيرك اوي على كدا  ، أنا هاكلم الباشا هو بيفهمنا: والنبي يا باشا خليهم يحترمونا  شوية  إحنا غلابة  ولا نعرف نقرا ولا نكتب بس بنفهم ونحس وجدعان أوي ، والنبي  يا باشا إحنا استوينا من اللعب عيشتنا ولاّ يعني  خلاص انكتب علينا البرنجان المنيّل  في طفح العيشة والحقيقة كمان ، انا أملي فيك يا باشا  . نخرج من زنقة المواسير و البلاعات دي .

*صندوق نوسة  ،البرنجان اللسْود ،  أول مايمرر، تنده على رضا يرميه بعيد  وتزرع على نظيف .
ولم ينته بعد ..