كتب : مدحت بشاي
medhatbe@gmail.com

مع الاعتذار للإعلامي مجدي الجلاد وبرنامجه " لازم نفهم " ، أجدني ومعايا من أهالينا الطيبين اللي بيسألوا وعايزين يفهموا ويعرفوا إيه اللي بيحصل وليه بيحصل ، وطيب إيه النتيجة .. يا جماعة أنتم لسه فاكرين .. طيب مش ده فلان اللي بهدل الدنيا مرجعينه ليه لمنصبه ، هو المسئول ده ولا مؤاخذة طري ليه كده .. حاجات كتيرة محتاجين نفهمها على الأقل علشان نتعايش معاها ونتعود ..

•    هوه الدكتور وزير التعليم العالي ما يعرفش إن حكم المحكمة الخاص بطرد الحرس الجامعي كان يخص جامعة القاهرة بس وده اللي خلاه يقول بخطابية عنترية إنه رجل قانون وأن القانون قال كلمته بطرد الحرس الجامعي ، أهو فطنتك يا معالي الوزير .. الناس عايزة تفهم يكفيك كام منشأة تحترق وكام طالب يسقط في حومة معارك الجامعات .. يادكتور هوه مافيش حد فاهم وعارف في الحكومة أو في دواوين وزارتكم يقول لكم أن العشرات كل يوم بينضموا لجماعات الوكسة الإخوانية من باب التعاطف مع تعدد مشاهد القبض على المخالفين واللي بيصابوا .. وبعدين .. فهمونا !!

•    هوه وزير الأوقاف بعد ما أصدر قراراته الرائعة بعيداً عن حالة الليونة والميوعة للحكومة ، واللي جت لتطوير وإصلاح الخطاب الديني ، ولكن يامعالي الوزير كل الكوارث اللي فاتت ما بتقولش انه فيه حصلت فعلاً .. لما حققوا مع بعض شياب المسيرات الغير سلمية ، قالوا الشيخ فلان الفلاني ، قال لنا الطلوع في المسيرات ضرورة دينية ودفع لينا حاجة كويسة وجاب لنا ميكروباسات وجينا لحد ما وقعنا في إيدين الحكومة .. وبعدين يا معالي الوزير ، مش كفاية اللي عامله زميلكم وزير الجامعات المصرية ؟!!

•    هوه في بني ادم في الدنيا يقول يا حكومة وانت ياعم مفيد فوزي في حد يقول لازم الإخوان يرجعوا ويندمجوا في العمل السياسي ، والأخ  مفيد زودها كمان وقال ياريت مرسي يرشخ نغسه في الانتخابات الرئاسية .. يادي الخيبة ده مش بس الإخوان المغيبين .. ويا حكومتنا إيه رأيك في اختراق جهازالأمن الوطني وماقيل انه السبب في اغتيال شهيده النبيل .. عايزين نفهم تعبتونا !!!

•    ويا كنيستي العظيمة العتيدة ويا بطريركنا الذي أحببناه لأنك أحببتنا واقتربت منا .. ذهبت للفنان المريض في رسالة هامة للجميع .. كنت الحاضر والمشارك في صلاة الجنازة على روح مفكر اختلف في بعض وجهات النظر مع الكنيسة لتعلن ان حكاية الراعي المفكر والمصلح الذي رفضت الكنيسة الصلاة عليه لن تتكرر .. لكن هناك مشهد تكرر عندما خرجت لتعلن انه لا متخدث باسم الكنيسة سواكم والمتحدث الإعلامي ، وبنفس درجة غضب قداسة البابا شنودة ، والسبب مجموعة من المنتفعين على حساب مصلحة الكنيسة العليا .. نود قداستكم تغير نهج تسهيل مهام هؤلاء .. وأن تجالسوا والأساقفة الجميع .. حزين خروج لائحة انتخاب لائحة البابا دون مشاركة كل بشر ابراشيات الكنيسة .. وتوسيع دوائر المشاركة .. كنيستنا عايزين نفهم ايه اللي بيحصل ...