زمان اول مااخترعوا القانون كان بسبب القتل فالقتل والنهب كانوا كتروا اوى ايام 

 زمان والحكماء كانت لازم تفكر فى رادع يوقفهم عند حدهم ولما لقيوا ان القانون جاب نتيجة كويسة فى ردع الناس وقلل فعلا فى انتشار الجرايم فبدأوا يدخلوا حاجات تانية زى السرقة والنصب والدعارة والمخدرات لأن المجتمع اكتشف ان كل دى حاجات بتضر بيه وباجياله  اللى هما اساس المجتمع فكان لازم يقننها علشان يعرف يحافظ على مستقبل بلده

 

بمناسبة الحاجات الجديدة اللى كل شوية تدخل تحت عباية القانون , محتاجين تهمة جديدة لها رادع قوى لانها مش هتدمر الجيل الجاى بس لكنها كمان هتدمر الاجيال الحالية من اول سن الحضانة لحد سن جدى وجدك وهى الاسفاف والابتذال فى السينما المصرية ...

من جييل اتربى على بين الاطلال ونهر الحب وغيره لحد ماوصل بينا الحال لعبده موتة و8% اللى هيا بيرة يعنى للقشاش وافلام تانية مايعلم بيها الا ربنا 

صحيح كانوا ايام زمان زعلانين اوى لما طلعت مسرحية زى مدرسة المشاغبين وقالوا عليها مثال للابتذال وهاتضيع جيل بحاله لكن المسرحية دى مقارنة بافلام دلوقتى نقدر نقول عليها زى افلام توم وجيرى او عم دهب وبطوط 

ده غيرالاغانى المنحلة والرقاصات اللى فيها , الافلام دى مقصود منها انها تعلم الجيل ايه ! , جيلنا لما كان بيقول لواحدة موزة كان بيحاول يخطفها ووشه يحمر فيها ممكن يزعل البنت اللى قدامه بسببها , لكن دلوقتى ماشاء الله كلمة موزة دى بقى بيقولها اطفال الحضانة لمدرساتهم دول لومكنوش بيقولوا اديك فى الجركن تركن واديك فى الحارة سجارة .... دى اغانى ولادى افلام ... ولا دى رقابة !!!! ... هى دى بلد

 ازاى بلد راضية بكدة 
 

زمان لما كنا نسمع اغنية كوتومووتو ولا مكارينا ونستغرب اوى من مجرد الكلمات لكن مفهاش اى لفظ خارج او ايحاء حتى ولا كليبات دلوقتى اللى رقصاتها بقيت تلبس من غير هدوم :) 

معقول هو ده الجيل اللى المفروض هايوصل البلد لبر الامان ويفوقها من اللى هى فيه ده !!

هو ده اللى هيقومها من الازمة الاقتصادية ومشكلة السياحة ونكسة السياسة اللى احنا فيها ولا خلاص بقى نقول طز فى البلد وطزين فى الجيل كمان

بس لا المنتجيين غلطانين ولحكومة غلطها مش كببير اوى زيينا الغلطة غلطة مجتمع لان المفروض احنا اللى نقاطع الافلام دى لحد مايتعدل حالهم ويرجع الحال على الاقل زى ماكان من كام سنة فات, لكن طول ماحنا بنتفرج وبنشجع وبندفع يبقى ليه تقف المهزلة دى ؟ مااديها مستمرة ورزق الهبل على المجانيين وهى بانسبة للمنتج جارة عرض وطلب
 

منظمات المجتمع المدنى لازم تقف جنب الحكمومة ضد الانحلال الاخلاقى ده اللى اكيد هيسموه الحرية

لكن انا هاقولك تعقيب صغير على كلمة حرية دى ان بلاد الحرية دى فيها صحيح حرية وانفتاح اكتر بكتر من مصر زى فرق السما والارض كدة لكن فيها وعى وتعليم وثقافة تخليهم قادريين يفصلواعن اللى بيشوفوه وعن المجتمع وعنده شخصية مستقلة تعرف تاخد قرار تشوف ايه ومتشوفش ايه وغير ده وده بره اصلا محدش عنده وقته يضيع لان كل بيدورعلى اللى يفيده بس .