بقلم: مينا نبيل فرنسيس
اسف اني بتكلم عامية دارجة ملهاش علاقة بلغة المقالات ولا الكتابة الصحفية بس دا مش وقت فذلكة خالص ولا كلام منمق...! ياجماعة انا بحب اخواتي المسلمين بجد ومش كلام... واللي عاشرني عارف اني معنديش مشكلة مع الاختلاف، ولا مع عقيدة بنختلف سوا مع بعض فيها؛ لان بالنهاية احنا بنتعامل على اساس اننا بني ادمين مش على اساس انتماء دا لو فاهمين قلب الله بجد..!
بس لو هنتكلم بصراحة بعيد عن دفن راسنا بالرملة، وبعيد عن كلام الانشا والاغاني، ومقصدش بكلامي دا اعيب في الاسلام اطلاقا؛ لان القصة قصة بشر مش دين سماوي..! احنا كمسيحيين تقريبا معظمنا عمر ما وصل لينا محبتكو، وديما خايفين منكو، وحاسين اننا منبوذين، وبنُعامل ككفار، وبنشوف دا في تصرفات تلقائة جدا من العامة تعبر عن عمق اللي بالقلوب...!
بشوف دا اما واحدة محجبة يكون واقف قدامها واحدة مسيحية ف المترو مترضاش تقف لها وتقف لو جت واحدة مسلمة وتقعدها مكانها...! بشوف دا اما اكون بالمترو وحد يشوف صليب بايدي ويقول استغفر الله وكانه شاف شيطان..! بشوف دا ف حصص الدين اما كانوا بيفصلونا ويرمونا بالحوش..! بشوف دا في جوامع كتير يوم الجمعة وهي بتدعي علينا وتكفرنا..! بشوف دا اما صحبي وانا طفل يبطل يلعب معايا واما اساله يقلي بابا قالي انك مسيحي (حصل فعلا معايا)! بشوف دا اما اسمع حد امه بتقله غيَّر الارف دا عشان وهو بيحول القناة لقى القداس بتاع العيد...! بشوف دا اما نسمع دا راجل محترم بس خسارة مسيحي..! بشوف دا اما مسلمين مش بيردوا يدخلوا بيوتنا وان دخلوا بيخافوا يشربوا حاجة عندنا..! بشوف دا اما بسمع اللي بيتقال على كنايسنا..!
شفت دا اما بالمدرسة شباب كانوا بيتريقوا على واد مسيحي غلبان واما واد قالهم حرام عليكو رد واحد قاله هو صعبان عليك؟ دا مسيحي فرد قاله لا طبعا مش صعبان علي...! شفت دا بعيني مرات اما اكون واقف وسط جروب ويشتمو ع الصليب او ع المسيحيين واما يعرفوا اني مسيحي يتكسفوا ويتاسفوا ويقولو تبريرات ومعلش مكناش نقصد...! شفت دا اما نكون مع بعض بمحبة واحنا اطفال واما يكبروا المعاملة تتتغير!
بشوف دا ف عدم وجود مسيحيين في مجالات كتير بالدولة... الخ الخ، وكل دا عايشته بنفسي مش بحكي كلام اتحكالي..! وكل دا من قبل ظهور السلفيين والاخوان ع السطح ومن الناس العادية...! والمشكلة مش مشكلة اسلام.. مشكلة ناس.. عاوزيني اقول كلام وردي ومثالي ونغني على بعض ونقول كلام القناة الاولى، وان الكلام دا مش حقيقي، ومفيش بينا كدا، وعايشين مع بعض زي الفل اوكيه... بس دا حقيقة موجعة بدل ما نحاول ننفيها ياريت نحاول نغيرها ونعترف بيها لان بجد مش واصل لمعظمنا ومش هقول كلنا اننا محبوبين ولا مقبولين، وديما خايفين منكم، وبدل ما تحاولوا تنفوا دا فكرو فيه بعمق وقدروا عمق الالم الدفين اللي جوانا من الكلام دا، ناهيك عن كم القتلى والظلم اللي بيقع علينا، وياريت بلاش الشماعة الساذجة بتاعة الفلول وامن الدولة وان دا قلة؛ لان حوادث فتنة كتير الامن مكنش ليه علاقة بيها...!
انا واحنا بجد بنحبكم بجد ومتعرفوش بنصلي ليكم بمحبة ازاي طول الوقت، بس مش حاسين بدا منكم.. وياريت ياجماعة محدش يقولي اللي بيعمل كدا دا مش فاهم الاسلام صح.. اوكيه انا مقلتش ان الاسلام قال كدا، بس مين طيب وفين اللي فاهمين الاسلام صح عشان يغيرو الصورة دي؟ وليه هما دول اللي طاغيين ع المشهد مش المعتدلين او اللي فاهمين صح زي ما بيتقال؟ سامحوني...! بس لازم نواجه الواقع، وحطوا نفسكو مكانا لو انتو اقلية قياسا بالعدد، وبيحصل معاكو دا هل هتقبلو التبريرات اللي بتقولوها؟ تاني بكرر بحبكو ومشكلتي مش مع الاسلام نهائي..!
