صحيت الصبح وعلى غير العادة مكنتش مكشر لأ وايه كمان دانا كنت مبتسم لأنى بعيد عنكم بصحى كل يوم الصبح وشى منكمش كدة ومكشر تكشيرة كفيلة انها تكئب اجدعها عريس يوم فرحه ركزوا معايا فى كلمة فرحه دى وعريس عشان هنتكلم عليها كمان شوية المهم مطولش عليكم قومت من السرير على طول قبل ما أشرب قهوتى اللى بتوصلنى لحد الحمام عشان اقدراغسل وشى.

 

وكل السعادة اللى انا فيها دى عشان حلمت حلم قال خير الله ماااجعله خير انا نويت اتجوز وروحت اخطب فعلا وشوفت نفسى فى الحلم جايب بوكيه ورد أصفرولابس بدلة وكرافتة حمرا اى والله كات حمرا  ... حييييح مع ان الفكرة مكنتش فى بالى اصلا   لما قومت من النوم لقيت الفكرة شعشعت فى دماغى وقولت ليه لأ مانا فعلا لازم اتجوز بقى.

 

وروحت مظبطلى قعدة رومانسية فى البلكونة على خلفية كلاكسات العربيات وميكروفونات الكارو وعملتلى كوباية شاى بالنعناع وطلعت ورقة وقلم وابتديت امخمخ.

 

عايز بقى ابدع فى اختيار ملكة الجمال بنت المحظوظة اللى هتنول الشرف وتتجوزنى وقعدت اكتب اول حاجة لازم تكونة جميلة قـــمر قمر وبيضة وطولها 170 ولاحاجة كدة تبقى صاروخ اصلا وطبعا مش مفشكلة يعنى شبه الممثلين مع ان ده أكل عيشهم ولو معملوش فى نفسهم كدة مش هيشتغلوا  وتكون كمان اجتماعية ورقيقة ونغشة وطعمة وبعدين سرحت شوية كدة وفكرت وقولت معقول حد بيتجوز بالورقة والقلم فى الزمن ده !! , روحت مقطع الورقة وبدأت اكتب الموضوع ده.

 

هو الحب بيتقاس بالمازورة ؟ وهل انا قبل ماأعجب بواحدة هكون محدد مواصفاتها طب وايه المواصفات الهابلة دى اللى تربطنى بواحدة طول حياتى وتربط واحدة بيا طول حياتها علشان بنينا حياتنا على شوية قواعد ومقايسات متنفعش غير فى الهندسة او اختيار شقة اوعربية , هيا ايه المشكلة لو بيضة ولا ايه المشكلة لو سمرا وايه المشكلة قصيرة وبرضو ايه المشكلة لو طويلة ؟؟

 

طب ممكن تكون اجتماعية وتزهقنى باجتماعيتها ودايما مشغولة وبرا البيت ومش فاضيالى بس برضو ممكن متكونش اجتماعية وقاعدالى طول اليوم فى البيت خرجنى خرجنى ولا طموحة وشغالة وشغلها اهم منى ولا ست بيت وتبقى كل تسلياتها حكاوى القهاوى مع الجيران طب عايزها طيبة ولا دماغها كويسة طب طيبة لحد السذاجة ولا دماغها كويسة لحد الشر ؟! .. عايزها متدينة اوى تخنقنى وتقولى قال الله وقال الرسول ولا مش فى دماغها اصلا وعايشاها بالطول والعرض .. ياترى هتكون غنية وترفعنى معاها ولا فقيرة هتفقرنى جنبها ... طب على الاقل حلوة عشان نحسن النسل ولا يمكن أعجب بواحدة وحشة وأئجل موضوع تحسين النسل ده للاجيال اللى بعد كدة ..

 

ستوب بقى وبلاش كلام فارغ مفيش حب كدة ومفيش حاجة اسمها حب بمواصفات قياسية مش هنحدد مطالب وكل واحدة نلاقيها نعلم عليها علامة صح وبعد كدة نشوف اللى بعده احنا بنختارحياة جديدة مكملة معانا عمرنا كله.

 

اكيد هايبقى فى مواصفات صحيح لكن مش بالدقة دى لكن هتكون حالة على بعضها بحكم عليها فى المجمل ومع شوية مرونة انا بقدر اتحرك من خلالها هاشوف هاتنفع ولا لا.

 

الحب لما بيخبطنا وقاصد اقول بيخبطنا لانها خبطة فعلا مش تشبيه حتى ,لا هايخليك تفكر فى مواصفات ولا شكل ولا ... لكن هتلاقيها باكيدج كدة على بعض ولو حد سئلك اشمعنا دى مش هترد غير رد  واحد بس كلنا بنرده ساعتها بصدق " معرفش " .

 

تيجى تفتكر بقى المواصفات اللى حددتها زمان وتقول لنفسك اصل القلوب اتلاقت ودابت وحتى العيوب بقيت شايفها ميزات وعجبتنى

أكيد كل خطوة بنخطيها لازم ناخد رأى العقل فيها بمقدار معين وكمان فى الحب لازم يتدخل بشكل كبير لكن مننحازش احنا للعقل ولا القلب ونسيب الاتنين ياخدوا ويدوا مع بعض بشكل طبيعى

 

والقلب لما يحب بيحب قلب قصاده لكن العقل ...... ملوش فى الحب 

ونصيحة مجرب بقى : كل ماهتسيب عقلك يخنق قلبك ويتعنطز عليه بحكمته هيموت منك الحب وشوية شوية هتلاقى الحب داب واتفرفت منك لحد لما يموت وتبقى ماشى بمبدأ 1+1=2