بقلم / أشرف فايز
سوريا خلاص بتتحرق
زي مااتحرق العراق
قلب العروبة بيفترق
واللا انتوا خدتوا على الفراق
مين السبب في لون حياتنا بالسواد الاكتر ملل
مين السبب في كون خيبتنا جايه راكبه ميتين جمل
مين اللي قاتل صبحنا ؟ مين اللي كاتم فرحنا؟
مين اللي عاوز جرحنا يفضل وعمره مايندمل؟
مين خانق الصبح الجرئ في عيونك يابلد؟
مين ضيع الفرح البرئ من قلب طفل بيتولد؟
مين الدنئ ؟ قاتل وماشي في جنازة اللي اتقتل
٠٠٠٠٠٠
ياقلوب حجر وعيون قزاز
فين الحقيقه والمجاز
فين ودنكوا من صرخة الخوف
اللي طاله من عيون
رافضه بمبدأ الابتزاز
رافضه تكون حيوان تجارب
للي يمتلكوا الجهاز
لو تكدبوا؟
هما رافضين كدبكوا
لو تلعبوا؟
رافضين قوانين لعبكوا
رافضين تكونوا في قربهم
رافضين يكونوا ف قربكوا
قبل الأوان
خلصت حكاوي شهر زاد
والسندباد
راهن على كل التاريخ
وخسر الرهان
قبل الأوان
بغداد بتصرخ لهارونها الرشيد
إلحق خليفتك مد إيده للغريب
ودمشق تنده من بعيد
عبد الملك وابنه الوليد
ولا حياة لمن تنادي ولا مجيب
شوفوا بعيونكم وحسوا
مره واحده بالوجع
دوقوا ولو للحظه واحده
نار فجيعة اللي اتفجع
يايهوذات العصر في هدوم الحواري
شوفوا الحقيقه من شبابيك الحواري
من بيوت عزبتنا أو جوه النجوع
حسوا مره ازاي نجوع
من غير ركوع
شوفونا مره بصوره حيه على الطبيعه
مش من قصر ليكوا ف منتجع
وادي التاريخ بيعيد حسابه من جديد
واليوم رجع
سلم مفاتيح المدينه للي على ف سعرها
وبالكاش دفع
كسر ٠٠ نصب٠٠ طرح ٠٠ رفع
كله بوجع كله بوجع كله بوجع
كله بوجع
