صرح القيادى العمالى " كمال خليل " و قال  : " اليوم يوم الشروط والاملاءات...وفقا لما هو منشور بالمصرى اليوم فى صفحتها الاولى  " خلال ساعات يتوقع زيارة وزير خارجية قطر لمصر ليلتفى بالمرشد العام (بديع) للتوسط معه فى شروط فض الاعتصام .....وأيضا " بيرنز " و " باترسون " وصلوا للقاهرة , وحاملين خطة " اوربية – امريكية "  من سبع نقاط :الافراج عن جميع المقبوض عليهم من جماعة الاخوان -اسقاط الاتهامات الموجهة لمرسى وقيادات اخرى بالتيار الاسلامى -انهاء الإعتصامين -وقف العنف ضد الامن بما فى ذلك شبه جزيرة سيناء -استقالة الرئيس المعزول - الاتفاق على تعديل الدستور وليس اسقاطه والإبقاء على المواد المتعلقة بالشريعة الإسلامية -  حق حزب الحرية والعدالة فى خوض الانتخابات " ......

 

و أضاف " خليل " على الحساب الشخصى له على موقع التواصل الإجتماعى , و قال إن الناس رفعت صورة  " السيسى " لأنها " ببساطة مش لاقيه حد من صفوف المعارضة ترفع صورته " ...احزاب عطنة وانتهازية تكافح من عشرات السنين و لم تستطع  خلق قيادة جماهيرية تلتف حولها الناس ولا حزب ثورى يقوم بالمهمة ...وجبهة انقاذ مترددة ويدها مرتعشة الناس سبقاها بأميال ...الناس تهتف ف الشارع يسقط حكم المرشد وجبهة الانقاذ بتروح تقابل مرسى ....وده عيب المتحذلقين والأحزاب مش عيب الجماهير .......ولما طلعت ورقة تمرد واقبل عليها الجمهور الواسع ف الحوارى والأزقة والكفور كان لازم نفهم ان الناس بتدور على قائد تمشى وراه ولما الناس مالقتش حد مشيت وراء شباب تمرد ...الناس من شهور كانت بتبحث عن مخلص ...والأحزاب بتبحث عن كراسى وفضائيات ....فى الوقت اللى كانت الناس بتوقع على تمرد و شايفة ان " السيسى "  يبدو مترددا كانت الناس بتلعن " السيسى " ومتشككة فيه ....حينما انحاز "  السيسى "  لمطلب الجماهير فى ازاحة مرسى انحازت الناس اليه , ولما اتأكدت انه معاها , رفعت صورته ....وده الشىء الطبيعى"

 

و تابع " خليل " فقال : " يعنى انت كنت عايزهم يرفعوا صورة " السيد البدوى " والا صورة " سيد عبد العال " والا صورة  "عمرو موسى " ....الخ ..... و أضاف " خليل " " رضانا بالقليل والخوف رمانا بحكام المواكب والهفايا ....ظلم وقهر سنين يخللى الجماهير تبحث عن مخلص ..يخليها تبحث فى ذاكرتها التاريخية عن بطل قومى يحقق امانيها ...من حق الناس تحلم .....وياما الجماهير رفعت صور ناس ولما لقيتهم خذلوها رمت صورهم ف الارض ...فاكرين يا سياسين لما كانت بعض الاضرابات العمالية بترفع صور مبارك وعائشة عبد الهادى فى بداية الاضراب وبعد ما يوصلوا لطريق مسدود بيرموا الصور وبيدوسوها بالأقدام ....الناس رفعت صورة " السيسى " بتحلم بمخلص " بناصر " جديد " بشافيز "  تانى ولو خذلها هتخذله وهترمى صورته ..ولو رفعها هترفعه ...الناس بتحلم ..وماتحرموش الناس من حلمهم .