بقلم: مينا عطا الله
بضحك وانا في عيني دمعة
من كتر ضحكي بقت عيوني لامعة
بضحك .. ما هو اصل الضحك دائي من اول ابتدائي ولحد مادخلت الجامعة
بضحك يا دنيا علشان . لضحك يا يجيلي جنان
شايفة يا دنيا ضحكي ؟ تلاقيكي ولا سامعة
وان كان علي ضحكي ضحكي هو بكايا
ودموعي لو تملي راح تملي كوباية
وحكايتي في دموعي ودموعي دي حكاية
وفي شبعي وفي جوعي عايشة ويايا
بتريحلي اهاتي وتنورلي حياتي وفي عز مالاقي الضلمة دموعي تصبح شمعة
عرفتي يا دنيا ايه هي ضحكتي ؟!
ضحكتي سكتي
بضحك في وقت تعبي وفي وقت خنقتي
بضحك في وقت حزني وفي وقت فرحتي
عايش بضحك يا دنيا والضحكة دمعتي
